Аз 3 ноябр то 5 ноябри соли 2022 дар доираи татбиқи Лоиҳаи минтақавии «Ҷалби ҷонибҳои манфиатдор дар барқарорсозии мероси уран дар Осиёи Марказӣ Марҳилаи II» дар шаҳри Гулистони вилояти Суғд семинари техникӣ оид ба  таҳия намудани нақшаи чорабиниҳо  барои  огоҳонидани аҳолӣ дар бораи омодагӣ ба корҳои барқарорсозӣ ва ҷалби ҷонибҳои манфиатдор гузаронида шуд.

      Дар семинари техникӣ кормандони Филиали Агентии амнияти ХБРЯ дар вилояти Суғд, намояндагон аз шаҳри Истиқлол, ноҳияи Б.Ғафуров, ҷамоати Ғозиён, деҳаи Адрасман, БРСММ ва САҲА иштирок намуданд.

Сухани ифтитоҳиро муовини директор Аҳмедов Матин аз номи Агентии  амнияти ХБРЯ-ии АМИТ оғоз намуда, аҳамияти баргузории чорабинии мазкурро ҷиҳати огоҳонидани аҳолӣ пеш аз оғози корҳои рекултиви дар мавзеъҳои мероси уран қайд намуд.

 Зимни суханронӣ ӯ қайд намуд, ки дар таҳияи нақшаи чорабиниҳо саҳми намояндагон аз шаҳри Истиқлоли ноҳияи Б.Ғафурови ҷамоати деҳоти Ғозиен ва намояндагони деҳаи Адрасман, воқеъ дар наздикии партовгоҳи уран хеле муҳим мебошад ва оиди  мақсаду вазифаҳои семинари мазкур мухтасар тавзеҳ дод.

Владимир Лекаркин - Барномаи рушди СММ, Тоҷикистон, Дмитрий Прудских - намояндаи САҲА ва дигар ширкаткунандагон аз шаҳри Истиқлоли ноҳияи Б.Ғафуров, ҷамоати Ғозиен, деҳаи Адрасмон низ  бо суханҳои шодбошиӣ баромад намуданд.

Сипас ба иштирокчиёни семинар дар мавзӯъҳои зерин маърӯзаҳо пешниҳод карда шуданд:

- Майдонҳои мероси уран. Проблемаҳои асосӣ.

- заминаи меъёрии ҳуқуқӣ дар соҳаи бехатарии радиатсионӣ ва идоракунии партовҳои радиоактивӣ.

- лоиҳаҳои рекультиватсияи мавзеъҳои меросии уран.

Пас аз баромадҳо аз иштирокчиён хоҳиш карда шуд, ки ба гурӯҳҳо тақсим шаванд, то инки онҳо нақшаи чорабиниҳо оид ба омодагӣ ба корҳои барқарорсозӣ ва ҷалби ҷонибҳои манфиатдор, инчунин ҳадафу вазифаҳои онро таҳия намоянд.

Дар раванди семинар ҳамчунин масъалаҳои огоҳонидани аҳолӣ ва ҷонибҳои манфиатдор оид ба барқарорсозии партовгоҳҳо, бехатарии радиатсионӣ, мониторинг ва роҳҳои ҳалли мушкилоти рекултивии  партовгоҳҳо дар вилояти Суғд  муҳокима шуданд. Инчунин масъалаи  мушкилоти иҷтимоъиву иқтисодии минтақаҳое, ки дар он мавзеъҳои мероси уран ҷойгир шудаанд ва пешниҳодҳо оид ба беҳтар намудани шароити зиндагии мардум мавриди баррасӣ қарор гирифтанд.

Дар охири семинар ҳар як гурӯҳ нақшаи чорабиниҳоро оид ба омодагӣ ба корҳои барқарорсозӣ ва ҷалби ҷонибҳои манфиатдор бо таваҷҷӯҳ ба минтақаҳои дар боло зикршуда пешниҳод намуданд.