Аз санаи 23-юми май то 26-уми майи соли 2023 дар шаҳри Душанбе, аз ҷониби маъмурияти Агентии амнияти химиявӣ, биологӣ, радиатсионӣ ва ядроии Академияи миллии илмҳои Тоҷикистон (Агентии ХБРЯ-и АМИТ) дар ҳамкорӣ бо Агентии байналмилалии неруи атомӣ (АБНА) бо мақсади густариши барномаҳои ҳамкории техникии АБНА нишасти ҳамоҳангсозони миллии иртиботӣ баргузор гардид.

Дар нишасти мазкур намояндагони зиёда аз 30 давлати аъзои Аврупо ва Осиёи Марказӣ ба таври ҳузурӣ иштирок карда, ҳамзамон беш аз 35 давлати аъзои АБНА тариқи маҷозӣ ба ҳамоиш пайваст шуд. Ҳамоиши мазкур аз ҷониби Ҳукумати Ҷумҳурии Тоҷикистон бори нахуст ташкил карда шуд.

Сипас, директори Агентии ХБРЯ-и АМИТ Илҳом Мирсаидзода, қайд намуд, ки дар ҳамоиши мазкур мутахассисони лоиҳаҳои марбут ба солимгардонии партовҳои коркарди маъдани уран, амнияти ядроӣ ва радиатсионӣ, соҳаи тандурустӣ, таҷҳизонидани марказҳои саратоншиносӣ бо таҷҳизоти муосир бо мақсади пешгирӣ кардани бемориҳои саратон, ҳамзамон масъалаҳои вобаста ба ҳифзи пиряхҳо ва истифодаи радионуклитҳо ва технологияҳои радиатсионӣ барои муайян кардани синни пиряхҳо, ҳифзи ин пиряхҳо, инчунин лоиҳаҳои байналмилалӣ, минтақавӣ ва миллӣ мавриди баррасӣ қарор мегиранд.

«Ҷаласаи солонаи ҳамоҳангсозони миллии робитаҳо ба такмил ва пешбурди лоиҳаҳои ҳамкории техникии АБНА бахшида шуда, барои мамлакатҳои аъзо платформаи муҳим ҷиҳати ҳамкорӣ ва табодули афкор, таҷрибаи пешқадам дар татбиқи барномаҳои ҳамкории техникии АБНА мебошад», - изҳор дошт, зимни суханронии худ директори Агентии ХБРЯ-и АМИТ.

Таъкид гардид, ки ин ҳамоиш ба намояндагони кишварҳои аъзои минтақаи Аврупо ва Осиёи Марказӣ имкон медиҳад, ки самаранокӣ ва таъсири лоиҳаҳои ҷориро арзёбӣ кунанд, роҳҳои инноватсионии ҳалли мушкилоти пайдошударо омӯзанд ва доир ба масъалаҳои муҳимми ҳамкории техникӣ, бо мақсаду ҳадафҳои осоишта истифода бурдани илм ва техникаи ядроӣ маърӯза намуданд.

Иштирокчиён зимни баргузории ҷаласаҳои интерактивӣ, семинарҳо ва форумҳо бо ҳам мубодилаи афкор намуда, барномаҳои ҳамкории техникии АБНА ва инчунин мувофиқати онҳоро бо мақсади ноил шудан ба Ҳадафҳои Рушди Устувор мавриди баррасӣ қарор доданд.
Натиҷаҳои вохӯрӣ барои ташаккули стратегияҳо, сиёсатҳо ва ташаббусҳои оянда, ки ба рушди осоишта ва устувори давлатҳои аъзо, аз ҷумла Аврупо ва Осиёи Марказӣ тавассути татбиқи илм ва технологияи ядроӣ мусоидат мекунад, муфид хоҳад буд.