15-уми сентябри соли 2023 дар доираи татбиқи Барномаи миллии чорабиниҳои Ҷумҳурии Тоҷикистон маросими супоридани автомашинаҳои тамғаи «Toyota Hilux» ба Қӯшунҳои сарҳадии Кумитаи давлатии амнияти миллии Ҷумҳурии Тоҷикистон тибқи қатъномаи 1540 Шурои Амнияти Созмони Милали Муттаҳид баргузор гардид. Директори Агентии амнияти химиявӣ, биологӣ, радиатсионӣ ва ядроии Академияи миллии илмҳои Тоҷикистон Илҳом МИРСАИДЗОДА ҳамчун ҳамоҳангсози миллӣ мошинҳои мазкурро барои истифодаи хизматӣ аз ҷониби кормандони Қӯшунҳои сарҳадии Кумитаи амнияти давлатии Ҷумҳурии Тоҷикистон аз номи Департаменти энергетикаи Иёлоти Муттаҳидаи Амрико супорид. Бояд қайд намуд, ки ин кӯмаки фаннӣ дар чаҳорчӯбаи амалисозии тарҳи амнияти марзии сабз, ки ба таҳкими зерсохтҳои ниҳодҳои қудратии Ҷумҳурии Тоҷикистон дар марз бо Афғонистон нигаронида шудааст, ироа мешавад.

Лозим ба тазаккур аст, ки дар чаҳорчӯбаи иҷроиши тарҳи мазкур инчунин интиқоли либос, зиреҳи тан, таҷҳизот барои гузаронидани амалиёт дар шароитҳои кӯҳӣ, шаклҳои махсуси муҳофизатӣ барои безараргардонӣ аз минаҳо, дастгоҳҳои биниши шабона, дурбинҳо, моноклҳо, дастгоҳҳои мухобиравӣ (радиоалоқавӣ), мошинҳои махсуси ҳарбӣ, воситаҳои нақлиёту автобусҳое, ки бо таҷҳизоти ҳассос барои муайян кардани ҳаракати ғайриқонунии маводи ядроӣ ва радиоактивию  ҳоказои дигар муҷаҳҳаз шудаанд дар мадди назар аст.