28 январ дар Филиали Донишгоҳи давлатии Москва ба номи М.В. Ломоносов дар шаҳри Душанбе семинари илмӣ таҳти унвони «Ҳамкории Ҷумҳурии Тоҷикистон бо Ожонси байналмилалии энергияи атомӣ (МАГАТЭ)» баргузор гардид.

Директори Агентии амнияти ядроӣ ва радиатсионӣ назди Академияи миллии илмҳои Тоҷикистон (АЯРБ НАНТ), доктори илмҳои техникӣ Илҳом Мирсаидзода ҳамчун меҳмони фахрӣ дар семинар суханронӣ намуд.

Илҳом Мирсаидзода дар баромади худ оид ба ҳамкориҳои байналмилалӣ бо МАГАТЭ ва таъмини амнияти ядроӣ ва радиатсионӣ дар қаламрави Ҷумҳурии Тоҷикистон маълумоти муфассал пешниҳод кард. Ӯ доир ба масъалаҳои зерин сухан гуфт:

Дар бораи МАГАТЭ — созмони байниҳукуматии пешбари ҷаҳонӣ дар соҳаи ҳамкориҳои ядроӣ, фаъолияти он, асосҳои ҳуқуқӣ ва стандартҳои амниятии байналмилалӣ.

Дар бораи Агентии амнияти ядроӣ ва радиатсионии НАНТ ҳамчун мақомоти танзимкунандаи давлатӣ дар соҳаи таъмини амнияти радиатсионӣ дар Ҷумҳурии Тоҷикистон, самтҳои асосии фаъолият, сохтор, санадҳои меъёриву ҳуқуқӣ ва лоиҳаҳои амалӣ.

Таваҷҷуҳи махсус ба масъалаи ҳамкории байналмилалии АЯРБ бо МАГАТЭ зоҳир гардид, ки яке аз самтҳои калидии фаъолият маҳсуб ёфта, ба татбиқи лоиҳаҳои байналмилалӣ ва миллӣ мусоидат менамояд. Дар доираи ҳамкориҳо бо МАГАТЭ дар Ҷумҳурии Тоҷикистон як қатор лоиҳаҳои муҳим татбиқ шудаанд, аз ҷумла:

Модернизатсия ва муҷаҳҳазгардонии марказҳои онкологӣ дар кишвар мутобиқ ба талаботи байналмилалӣ ва стандартҳо, ки саҳми назаррас дар табобати беморони саратонӣ доранд;

Таъмин намудани Хадамоти гумрук ва Қувваҳои сарҳадии КДАМ бо таҷҳизоти муосир (порталҳои радиатсионии мобилӣ, дастгоҳҳои дастӣ барои муайянсозии маводи радиоактивӣ ва таҷҳизоти ошкорсозии интиқоли ғайриқонунии маводи радиоактивӣ);

Гузаронидани давраҳои омӯзишӣ ва семинарҳои минтақавӣ оид ба истифодаи ин таҷҳизот бо иштироки мутахассисони АЯРБ ва коршиносони байналмилалии МАГАТЭ.

Ҳамчунин, Илҳом Мирсаидзода дар бораи нуқтаи ҷумҳуриявии дафни партовҳои радиоактивӣ, интиқол ва омӯзиши онҳо, инчунин таҳқиқоти илмии масоҳати мавзеъҳои маводи радиоактивӣ ва масоили марбут ба tailing-и уран дар шимоли кишвар, ки пас аз пошхӯрии Иттиҳоди Шӯравӣ бесоҳиб монда буданд ва ҳоло корҳои барқарорсозӣ дар он идома доранд, маълумот дод.

Семинар бо баҳсу мунозираҳои пурмуҳтаво ва саволҳои марбут аз ҷониби устодон ва донишҷӯёни Филиали ДМТ ба номи М.В. Ломоносов дар шаҳри Душанбе анҷом ёфт. Аз ҷумла, доктори илмҳои техникӣ Умарова Татьяна Мухсиновна ба Илҳом Мирсаидзода барои баромади пурмуҳтаво ва иттилоотии ӯ изҳори миннатдорӣ баён намуданд, ки ба донишҷӯён имкон дод, дар бораи соҳаи амнияти ядроӣ ва радиатсионӣ донишҳои нав ба даст оваранд.

Дар анҷом, директори АЯРБ НАНТ Илҳом Мирсаидзода донишҷӯёни филиали ДМТ ба номи М.В. Ломоносовро ба боздид аз Маркази таълимии минтақавии АЯРБ даъват намуд.