Семинари илмӣ зери унвонӣ “Маҳфузгоҳҳои урании Тоҷикистон : муаммоҳо ва ҳалли онҳо” бахшида ба 80 – солагии зодрӯзи аввалин директори Филиали Агентӣ дар вилояти Суғд, шодравон Нӯъмонҷон Ҳакимов
22 августи соли 2025 дар Филиали Агентӣ дар вилояти Суғд семинари илмӣ дар мавзӯи “Маҳфузгоҳҳои урании Тоҷикистон: муаммоҳо ва ҳалли онҳо” бахшида ба 80-солагии зодрӯзи аввалин директори Филиали Агентӣ дар вилояти Суғд шодравон Нӯъмонҷон Ҳакимов баргузор гардид.
Дар семинар муовини директори Филиали Агентӣ дар вилояти Суғд, доктори илмҳои техникӣ, профессор Холмурод Назаров оид ба мавзӯи “Маҳфузгоҳҳои урании Тоҷикистон: муаммоҳо ва ҳалли онҳо” бо презентатсияи пурмазмун баромад намуд.
Мавсуф қайд кард, ки дар солҳои 40-90-уми асри гузашта Ҷумҳурии Тоҷикистон яке аз минтақаҳои муҳими Иттифоқи Шӯравӣ дар коркарди маъдани уран ба ҳисоб мерафт. Дар натиҷаи фаъолияти истеҳсоли ашёи хоми уран дар ҳудуди шимоли Ҷумҳурии Тоҷикистон 10 маҳфузгоҳи партовҳои радиоактивӣ таъсис ёфт, ки дар онҳо зиёда аз 55 миллион тонна партовҳои радиоактивӣ бо фаъолнокии паст нигоҳ дошта мешаванд. Яке аз муаммоҳои асосӣ ин буд, ки Тоҷикистони соҳибистиқлол бояд чораҳои зарурии таъмини бехатарии радиатсионӣ барои ҳифзи саломатии аҳолӣ ва муҳити зист атрофи маҳфузгоҳҳо амалӣ мекард.
Дар рафти семинар ба саволҳои сершумори иштирокчиён оид ба корҳои солимгардонӣ дар маҳфузгоҳҳои партовҳои радиоактивии вилояти Суғд, аз ҷумла маҳфузгоҳҳои шаҳри Истиқлол ва Адрасмон, ҷавобҳои мушаххас дода шуданд.
Зимни баромади худ Холмурод Назаров таъкид намуд, ки дар самти солимгардонии маҳфузгоҳҳои партовҳои радиоактивӣ дар Ҷумҳурии Тоҷикистон нақши шодравон Нӯъмонҷон Ҳакимов хеле бориз аст. Ӯ ҳамчун истеҳсолкунандаи ботаҷрибаи саноати урани Тоҷикистон тамоми кӯшишу ғайрат ва дониши худро барои оғози корҳои солимгардонӣ равона намуда, аз таҷрибаи худ мунтазам нақл мекард ва маслиҳатҳои муфид пешниҳод менамуд.
